У заяве гаворыцца, што санкцыі «найперш нэгатыўна адаб’юцца на працоўных беларускіх прадпрыемстваў… Увядзеньне санкцыяў Эўразьвязам можа пацягнуць за сабою зьніжэньне прыбыткаў прадпрыемстваў, скарачэньне вытворчасьці і працоўных месцаў, недаатрыманьне працоўнымі гарантаваных калектыўнымі дамовамі выплат, складанасьці ў працэсе павелічэньня заработнай платы працоўных».

У Фэдэрацыі прафсаюзаў Беларусі і яе арганізацыях — больш за 4 мільёны чалавек.

23 сакавіка Эўрасаюз ухваліў эканамічныя санкцыі ў дачыненьні да 29 беларускіх кампаній.

Факт зьяўленьня звароту камэнтуе кіраўнік незалежнага прафсаюзу «Граніту» Алег Стахаевіч:

Алег Стахаевич

​​«Кожны разумее, што найбольшую шкоду рабочым нанёс урад. Бо крызіс, які ўзьнік і працягваецца, — гэта ж не віна санкцыяў, правільна? А заява — гэта страх страціць кантроль над людзьмі. Усе разумеюць, што ФПБ-шныя прафсаюзы — гэта прафсаюзы самой улады. А ўлада нас па тэлебачаньні корміць дэзынфармацыяй, пустымі абяцанкамі. Хлопцы з прадпрыемстваў кажуць, што мы гатовыя пацярпець месяц-два, абы толькі сытуацыя памянялася.

За 11 гадоў, якія працаваў, ані разу не было такога, каб афіцыйны прафсаюз прыходзіў, размаўляў зь людзьмі, цікавіўся, якія ёсьць праблемы, цяжкасьці, спрабаваў іх неяк разьвязаць».

Аляксандар Бухвостаў

​​Прафсаюзны лідэр Аляксандар Бухвостаў: «Фэдэрацыя прафсаюзаў абараняе пазыцыю ўраду і кіраўніцтва рэспублікі, якія фактычна пазбавілі працоўных усіх правоў. Гэта фактычна філіял Адміністрацыі прэзыдэнта. Яны падманваюць людзей у тым, што вінаватыя тыя, хто патрабуе санкцыяў. Дый санкцыяў ніхто не патрабуе.

А ў рэспубліцы цяпер не забясьпечваюцца правы працоўных. Пра гэта ўжо 12 гадоў разглядаецца пытаньне ў Міжнароднай арганізацыі працы. Людзі ня могуць вольна працаваць, бо яны зьвязаныя кантрактнай сыстэмай, іх прымушаюць падпісваць разнастайныя паперы пра тое, што яны ня будуць пратэставаць, удзельнічаць у грамадзянскіх дзеяньнях, масавых мерапрыемствах».

Версия для печати